И сим на сборое прочтенным бывшим архиереем же первенствующим преосвященный Макарий митрополит всея Русии со всем священным собором, со архиепископы и епископы и со честнейшими архимандриты и игумены, зело о сем удивишася и о благочестии слово изнесоша, и вседержителю богу хвалу воздаша. И бе чюдно видение и всякого ужаса исполнено толико царское величество церкви божий с душевным желанием совокупляется. И кто от толикия радости зельныя не испусти слез, видя царскую душу совокуплъшуся с церковным устроением.
Потом царь вдаст на соборе иная писания о новых чюдотворцех и о многих и различных церковных чинех и вопросех имуще сице.
ГЛАВА 4
«В седьмоенадесять лето возраста его по вашему святительскому соборному благословению и прощению и ваших ради святых молитв божиим строением осия благодать святаго Духа и коснуся разуму моему. Взыде на память мне и вожделе и возревнова душа моя, великое и неистощимое богатство от многих времен при прародителем наших сокровено и забвению предано. Великие светильники новые чудотворцы многими и неизреченными чудесы прославляеми богом, и егда наказание праведного гнева бывает нам за грехи наша, и мы тех святых новых чюдотворцев на помощь призываем, и творима нам от них всячески в земных потребах наказания божия на милосердие претворяемо их молением, и многими всякими различными недуги и исцеление получаху вскоре верою просящий у них. Мы же о сем молим святители всего нашего росийскаго царствия в митрополии о архиепискупъях и епискупъях коиждо во всяких пределах порученых им во градех и в монастырях и в пустынях и во всех известно пытати и обыскивати о великих новых чудотворцех священными соборы и игумены, и священноиноки, и иноки, и пустынники, и князми, и боляры, и богобоязнивыми людми, где которые чудотворцы прославилися великими чудесы и знамении от коликих времен и в каковы лета, святителие же убо от радости духовныя от вожделения сердечного и от начинания и повеления нашего моления вскоре собирают каноны и жития и чудеса тех великих святых новых чудотворцев, которыйждо святитель от своих предел по свидетельству тамо сущих жителей от священническаго и иноческаго чину и от боярска и от княжска роду и всех богобоязнивых мужей и жен, где которой святой прославился и просиял добрыми делы и чюдесы. И в 19 лето возраста моего по нашему наказу архиепископы и епископы и честныя архимариты и игумены собираются в царствующей сей град к нам ко отцу нашему Макарию митрополиту всеа Русии, каноны новых чудотворцев и жития их и чюдеса на соборе полагают и свидетельствуют всеми освященными соборы и предают церквам божиим пети и славити и празновати якоже прочим святым от века богу угодивщим по настоящему коегождо месеца дни и числа преставления их и святые имена и обретения честных мощей их. Им же поют и до сего дни. Мы же убо празнуем и ликоствуем и прославляем по уставу якоже предаша нам, многие же убо новопрославлении чюдотворцы по преставлении своем и доныне от далних прежних времян обретошася лежат целы и невредимы мало тлению причастишася и чюдеса различная творят, велия верою просящим у них. И тех великих новых чудотворцев молитвами начахом правити царство свое елико довлеют нам по благодати божий. В 21 лето от родства и во 18 лето царства моего по повелению нашему архиепископы и епископы, архимариты и игумены, и пустынники, и духовныя старцы и протопопы, и попы и со всеми освященными соборы всего нашего росийского царствия в царствующем граде Москве сообрашася и во святей соборней апостольской церкви пречистые Богородицы соборные молебны пев и вкупе моление совершив, в дому порученому мне от бога прародителей наших и нашего строения в царских палатах сшедшися вкупе и начахом о бозе творити дело сице».
