Иноческий молитвослов - страница 12

Аще готовишися ко причастию, канон ко Святому Причащению

Достойно есть яко воистинну блажити Тя Богородицу, Присноблаженную и Пренепорочную и Матерь Бога нашего. Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.

Трисвятое; по Отче наш;

В субботу вечера кондак воскресный по гласу недели

Глас 1

Воскресл еси из гроба во славе, и мiр совоскресил еси; и естество человеческое яко Бога воспевает Тя, и смерть исчезе́; Адам же ликует, Владыко, Ева, ныне от уз избавляема, радуется, зовущи: Ты еси, иже всем подая, Христе, воскресение.

Глас 2

Воскресл еси от гроба, Всесильне Спасе, и ад, видев чудо, ужасеся, и мертвии восташа; тварь же видящи срадуется Тебе, и Адам свеселится, и мiр, Спасе мой, воспевает Тя присно.

Глас 3

Воскресл еси днесь из гроба, Щедре, и нас возвел еси от врат смертных; днесь Адам ликует и радуется Ева, вкупе же и пророцы с патриархи воспевают непрестанно Божественную державу власти Твоея.

Глас 4

Спас и избавитель мой из гроба, яко Бог, воскреси́ от уз земнородныя, и врата адова сокруши, и яко Владыка воскре́се тридневен.

Глас 5

Ко аду, Спасе мой, сошел еси, и врата сокрушивый яко Всесилен, уме́рших яко Создатель совоскресил еси, и смерти жало сокрушил еси, и Адам от клятвы избавлен бысть, Человеколюбче; темже вси зовем: спаси нас, Господи.

Глас 6

Живоначальною дланию уме́ршия от мрачных удолий Жизнодавец воскресив, всех Христос Бог, воскресение подаде человеческому роду: есть бо всех Спаситель, воскресение и живот, и Бог всех.

Глас 7

Не ктому держава смертная возможет держати человеки: Христос бо сниде, сокрушая и разоряя силы ея; связуем бывает ад, пророцы согласно радуются, предста, глаголюще, Спас сущим в вере: изыди́те, вернии, в воскресение.

Глас 8

Воскрес из гроба, уме́ршия воздвигл еси, и Адама воскресил еси, и Ева ликует во Твоем воскресении, и мiрсти́и концы торжествуют еже из мертвых востанием Твоим, Многомилостиве.

В воскресение вечера тропарь безплотным силам, глас 4

Небесных воинств архистратизи, молим вас присно мы недостойнии, да вашими молитвами оградите́ нас кровом крил невещественныя вашея славы, сохраняюще ны припа́дающия прилежно и вопиющия: от бед избавите ны, яко чиноначальницы вышних сил.

Таже тропари всем святым, глас тойже

Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Иже во всем мiре мученик Твоих, яко багряницею и ви́ссом, кровьми́ Церковь Твоя украси́вшися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй, и душа́м нашим велию милость.

Слава:

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

И ныне:

Молитвами, Господи, всех святых и Богородицы, Твой мир даждь нам и помилуй нас, яко един Щедр.

Во вторник на повечерии тропарь Кресту, глас 1

Спаси, Господи, люди Твоя и благослови достояние Твое, победы православным христианом на сопротивныя даруя, и Твое сохраняя Крестом Твоим жительство.

Таже

Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Иже во всем мiре мученик Твоих, яко багряницею и ви́ссом, кровьми́ Церковь Твоя украси́вшися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй и душа́м нашим велию милость.