Иноческий молитвослов - страница 15

Икос Покаяннаго канона

Помысли, душе моя, горький час смерти и страшный суд Творца Твоего и Бога: ангели бо грознии по́ймут тя, душе́, и в вечный огнь введут; убо прежде смерти покайся, вопиющи: Господи, помилуй мя грешнаго.

Кондаки канона Богородице, глас 6

Предстательство христиан непостыдное, ходатайство ко Творцу непреложное, не пре́зри грешных молений гласы, но предвари, яко благая, на помощь нас, верно зовущих Ти; ускори на молитву, и потщися на умоление, предстательствующи присно, Богородице, чтущих Тя.

Не имамы иныя помощи, не имамы иныя надежды, разве Тебе, Пречистая Дево. Ты нам помози, на Тебе надеемся, и Тобою хвалимся, Твои бо есмы раби, да не постыдимся.

Стихира канона Богородице, глас тойже

Не ввери мя человеческому предстательству, Пресвятая Владычице, но приими моление раба Твоего; скорбь бо обдержи́т мя, терпети не могу демонскаго стреляния, покрова не имам, ниже́ где прибегну окаянный, всегда побеждаем, и утешения не имам, разве Тебе, Владычице мiра, упование и предстательство верных, не пре́зри моление мое, полезно сотвори.

Кондак канона Предтече, глас 3

Прежде неплоды, днесь Христова Предтечу раждает, и той есть исполнение всякаго пророчества; егоже бо пророцы исповедаша, на Сего во Иордане руку положив, явися Божия Слова пророк, проповедник, вкупе и Предтеча.

Икос канона Предтече

Восхва́лим ныне Господня Предтечу, егоже священнику елисавет роди́ из ложесн неплодных, но не без семене; Христос бо един вместилище про́йде непроходимо без семене. Иоанна неплоды роди, без мужа же сего не роди; Иисуса же, осенением Отца и Духа Божия, Дева роди Чистая. Но безсеменному явися от неплодове пророк, проповедник, вкупе и Предтеча.

Кондак канона ангелу хранителю, глас 4

Явися мне милосерд, святый ангеле Господень, хранителю мой, и не отлучайся от мене сквернаго, но просвети мя светом неприкосновенным и сотвори мя достойна Царствия Небеснаго.

Икос канона ангелу хранителю

Уничиженную душу мою многими соблазны, ты, святый предстателю, неизреченныя славы небесныя сподоби, и певец с лики безплотных сил Божиих; помилуй мя и сохрани, и помыслы добрыми душу мою просвети, да твоею славою, ангеле мой, обогащуся; и низложи зломыслящия мне враги, и сотвори мя достойна Царствия Небеснаго.

Седален Покаяннаго канона, глас 6

Помышляю день страшный и плачуся деяний моих лукавых; како отвещаю Безсмертному Царю, или коим дерзновением воззрю на Судию, блудный аз; Благоутробне Отче, Сыне Единородный и Ду́ше Святый, помилуй мя.

Богородичен по седальне

Связан многими ныне плени́цами грехов и содержим лютыми страстьми́ и беда́ми, к Тебе прибегаю, моему спасению, и вопию: помози ми, Дево, Мати Божия.

Седален канона Богородице, глас 2

Моление теплое и стена необоримая, милости источниче, мiрови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.

Седален канона Предтече, глас тойже

Благоутробия ради милости, Блаже, спасти Твое создание, Христе, пришел еси, преклонь небеса схождением Твоим. Темже страшное смотрение Твое поюще, вопием Ти: мольбами Предтечи Твоего очищение грехов подаждь нам, яко един Благоутробен.

Богородичен по седальне

Предстательнице теплая христианом, Сыну Твоему молися присно, Богородице, всякаго злодейства и огорчения избавити нас борца и дати нам прощение, в нихже согрешихом, за милосердие щедрот, Твоими молитвами, Мати Дево.