Книга об Антихристе и о прочих действах иже при нем быти хотящих - страница 11

Тако подобообразно надлежит разумети и о антихристе, ибо образовательно пришествие его начатся негли от времен Христова во плоти на земли пребывания, обаче не во своем ему лице от тогда даже до ныне пребывает, еже не возможно, но чрез его предотеч тогда деяшеся и ныне деется тайна его, сиречь уподобительная участная того злоба и Христу противление. О нем же видится и Иоанну Богослову рещи, яко антихрист в мире уже. И яве есть, яко таковый антихрист в мире уже тогда и ныне, сиречь того злоба и Христу противление в предотечах антихристовых тайнодейственне бывающее. Егда же истый той антихрист самообразне приидет, тогда открыется тайнодейство сие, и скончается самою истинною вещию, якоже апостол глаголет: «Тогда открыется человек беззаконию, сын погибельный» и прочая (2 Сол., 2, 3). И Ипполит святый глаголет: «Аще бо сам и не являяся ныне сын погибельный, невидимо нас ратуя, кознем и заколением нас отводит и устремляет. Тогда же, егда сам хощет самообразне приити» и прочая (Соборник, гл. 8). И преподобный Иоанн Дамаскин сказует свойственнообразно ему быти, якоже выше показахом.

И от всех сих вышеписанных святоотеческих сказаний удобно признается, яко самый той антихрист, свойственнообразно грядущий, не бе в мире тогда при апостолех. Понеже аще бы тогда при апостолех той антихрист был уже в мире, то почто бы святии отцы назнаменали ему время будущее? Яве того ради, понеже не бе его тогда в мире: паче же яко они после апостолов были нецыи от близ, инии же и от далече временем. Обаче тии назнаменуют ему время не прошедшее, аки бы при апостолех, ниже настоящее, аки бы при них, но будущее. Святый Ипполит в слове своем во многих местех время будущее являя, о нем глаголет: приидет, родится, изыдет, чудеса сотворит, и прочая такова. Сей святый бе по Христе в лето 261-е.

И святый Кирил Иерусалимский, бывый по Христе в лето 345-е, сей глаголет: «Приидет же преждереченный антихрист сицевым подобием» (знамение 9). И паки: «Ожидаем врага, иже помалу пошлет пред собою предотечь своих, даже и сам на готовое пришед, останок уловит» (знамение 7). «К жидом приидет, яко Христос, и от жидов прият имать быти» (знамение 4). «Ложно Христом прозовется, и тем прозванием жидов прельстит» (знамение 8). «И полчетверта лета будет люто царствовати» (знамение 9).

Преподобный Ефрем бе по Христе в лето 373-е, иже глаголет: «Не будет же во время то страшное покоя на земли, егда приидет змий». И паки: «Егда приидет прельстити всяческих, во свое время на кончину времен». И паки: «И кацем образом приидет на землю, родитбося воистинну» (слово 105).

Златоуст святый бе по Христе в лето 402-е, сей же сице глаголет: «Уже начинают посланницы антихристовы, сына беззаконнаго, но не у кончина, дондеже сам приидет» и прочая (Апостол толковый, зач. 150). И инде глаголет: «Егда бо приидет он, ничтоже повелевает здраво, точию от знамений ложных уверится». Ниже: «На погибель бо человеком приидет, вся подвигнет, вся возмутит» (2 Сол., беседа 4).

Преподобный Иоанн Дамаскин бе в лето по Христе 735-е, иже в 4-й книге своей, во главе 27-й глаголет: «Требе есть знати, яко подобает антихристу приити». Ниже: «Народится убо из блуда и внезапу привостанет и восцарствует. Приидет же в знамениих и чудесех лжи» и прочая.

Святый Никифор Каллист, иже бе в лето 844-е, то же повествуя, глаголет: «Преди же Христова втораго пришествия приидет сопротивник Христу, и чудеса сотворит, елико убо и Христос содея» и прочая (синоксарь в неделю мясопустную).