Книга об Антихристе и о прочих действах иже при нем быти хотящих - страница 15

Сие же двояким смыслом разумевати не безбедно есть, сиречь, еже бы колено Иудово и девую Матерь Божию, и рожество Христово чувственно: а колено Даново и деву от него сущую, и рождение антихристово аки бы мысленно. И таковое двоеразумие явно видится быти погрешение и несправедливость, понеже святии отцы во едином чувственном разуме не преносительно обоя сия приемлют, глаголюще: «Ельма бо Спас миру, спасти хотя род человечь, от чистыя и присно Девы Марии родися. Тем же образом и сопротивник от скверныя жены изыдет на землю. Якоже убо от колена Иудова раждается Христос, сице и от колена Данова родится антихрист. Во образе человечи явися Господь, и той подобие во образе человечи изыдет. От еврей Христос возсия, и той от иудей родится. Яко убо воистинну от колена Данова хощет родитися» (Ипполит, Слово об антихристе, Соборник, гл. 8).

Ельма же сия тако суть в самой истине, понеже сице Иаков-Израиль прорече, Моисей же и Иеремия пророцы предсказаша, яко от еврей от колена Данова имать изыти антихрист. Сие же их пророчество Ипполит святый в слове своем во свидетельство и утверждение приведе, и яснейшее толкование сотвори, обаче инуде не относит разума и глагола пророческаго, но таяжде яснейше сказует, яко той от еврей от колена Данова от нечистыя жены девицы родится. Такожде и святый Никифор патриарх цареградский и списатель книги о правой вере, и сочинитель «Душезрительнаго зерцала» – все сии сказуют антихристу родитися от еврей от колена Данова от скверныя девицы, а не преводя на иный мысленный разум, сиречь акибы сия не естеством дева, но жидовская вера или кое нечестие, или ино что таково, но яве тако быти сказуют Никифор Каллист и о правой вере списатель, Ипполита святаго во своих писаниях о сем во свидетельство приводят и тому последуют, якоже выше во главе сей писано. И аще убо сии и прочий вышеписаннии и инии таковии святии отцы о сем прямо по писмени сказуют, а таинственнаго некоего смысла не показуют, того ради и нам достоит такожде разумети, зане блаженно есть святоотеческому сказанию последовати, а не своему умышлению и погрешению подверженному умствованию, якоже нецыи творити обыкоша: иже не хотят тако о сих любомудрствовати, но свой некий таинственный приводят разум: аще хотя и свой, но Святым писанием мнятся утвердити, обаче писание взимают не от сего разума, но о ином чем реченное: аще же и о сих бывает, но и то в другом преводном разсуждении. Тем же, аще и писанием доказывают, но не бывает истинно таковое тех доказательство и мудрование, якоже зрится. Понеже в силе божественнаго писания многообразны суть разумения, аще и под единым именем речения, но начасте имут другий разум: якоже и выше в предисловии речеся о небеси и земли, о солнце и луне, и звездах, о горах и водах, и прочем.

Зде же о сих хотя мало нечто речем о горах и водах, чрез сия же и прочая объясняется. Убо существенне нарицаются горами и холмами чувственныя земленыя горы и холмы. И пресвятая Дева Богородица начасте горою нарицается (Даниил, гл. 2). Апостоли же и пророцы горами и холмами нарицаются (Маргарит, слово 13). И святая соборная и апостольская Церковь горою нарицается (Маргарит, слово 10, л. 528). Небо и небесная благая горами нарицаются (Соборник, гл. 6, ст. 14). Еще же сильныя жития сего (сиречь царие и князи и вей судии земли, и иже богатством изобилующим) и иже церковнаго чина сущии горами нарицаются (Апокалипсис толковый, гл. 6, зач. 18). И гордыя человецы горами нарицаются. И еретицы, сиречь о инославных учащий, яко и тии горами глаголются (Благовестник, от Марка, л. 69). И сатана, или диавол и вси беси горами и холмами нарицаются (Апокалипсис толковый, гл. 8, Евангелие толковое, неделя 10). Подобно и о водах: яве водами наричются чувственныя воды, ихже пием. И народы, сиречь вси человецы водами нарицаются (Благовестник, от Луки, л. 32, Апокалипсис, гл. 17). И Сам Той Христос Водою нарицается, и учение Христово водою нарицается, и Дух Святый водою нарицается (Евангелие толковое, неделя о самаряныни и неделя пятьдесятницы). К тому же и еще под именем воды и гор многия иныя вещи разумеются. И якоже о сих, тако подобно и о вышереченных, к тому же и о иных прочих, сице в священном писании разумеется, аще бо и то же едино имать наречение, но ину в себе носит смысла силу. Темже в таковом многообразном различных вещей под единым именем наречении, некто по неведению или по коей либо страсти своей может святое писание с подобающаго разума на ин разум прелагати: и с пристойнаго лица на ино лице, и с приличнаго времени на ино время неподобие и развратне преносити, себе же и прочих таковых, яков же сам он, прельстити. Сего ради чтущему святое писание должно есть благоразумно почитати, не гордостию и любоначалием, ниже завистию и тщеславием, но безпристрастно разсуждати.