В Сторожевом полку воевода князь Федор княж Ондреев сын Гундоров.
На Костроме воеводы Михайла Васильевич Яковль да князь Иван княж Иванов сын Кашин-Обовенского.
В Нижнем Новегороде с Ыльина дни велено быти в городе князю Петру Ивановичю Телятевскому; за городом князь Петр Олександрович Стригин-Оболенской. В Нижнем быти заповеди для Федору Григорьевичю Очину-Плещееву.
Того же лета 57-го в Смоленску годовали воеводы з боярином и наместником с Ываном Ивановичам Хобаровым с стретеньева дни Иван Иванович Жулебин, Мещенин Владыкин сын Дмитреев, Услюм Иванов сын Данилова, Данила Григорьев сын Фомина, Василей Тимофеев сын Замытцкого. А в приказе Григорей Семенов сын Белкин да Истома Манастырев.
Поход царя и великого князя зимней х Казани: Того же лета 57-го июля день царь и великий князь Иван Васильевич всея Русии, положа упование на бога и на пречистую богородицу, и на великих чюдотворец, приговорил з бояры, как ему своего дела и земского беречи и делати над Казанью, что на Казани царя Сафа-Кирея в животе не стало, а крымские князи, которые были с царем в Казани, и вся земля казанская учинили себе государем на Казани Сафа-Киреева сына, полутретья году царевича Утемиш-Гирея. И приговорил царь и великий князь, аже даст бог, итти ему самому х Казани зимою и дела своего и земского беречи, сколка ему милосердый бог поможет. А с царем и великим князем итти Шигалею царю Шиговлеяровичю да царевичю Едегерю астраханскому и царевым и великого князя воеводам со многими людьми; а срок воеводам и людем учинити ранея, чтоб тому делу мотчанья не было, итти бы х Казани по первому путю. А стояти царю и великому князю и с людьми збиратися в Володимере, а быти в Володимере цареву и великого князя полку да воеводам и детям боярским, которым быти у наряду; да в Володимере же быти Ертоульскому полку. А воеводам, которым быти по полком, – Болшому полку, Передовому полку, Правой руке, Левой руке, Сторожевому полку – стояти по городом и с людми збиратись в Суздале, в Шуе, в Муроме, на Костроме, в Ростове, в Ярославле, в Юрьеве, в Переславле того для, чтоб детем боярским московские земли и ноугородцким помещиком, и всем воинским людем по тем городом стояти нетесно и кормом своим и конским мочно прокормитися. А срок учинил воеводам быти по тем городом на Филипово заговенья. А детем боярским московские земли и ноугородцким помещиком, пяти пятином, и псковским помещиком, и торопецким помещиком, и лутцким, и ржевским срок учинил быти у воевод в тех городех на веденьев день.
А се роспись, которым воеводам в которых полкех быти и в котором городе с людми збиратися:
В Володимере быти на Филипово заговенья боярину и воеводе князю Ивану Федоровичю Мстисловскому. А детем боярским к нему збиратися цареву и великого князя полку. И которым детем боярским быти с яртоулы и которым у наряду, срок им веденьев день.
А по полком воеводы:
В Суздале быти на Филипово заговенья Большого полку воеводам боярину князю Дмитрею Федоровичю Белскому да князю Володимеру Ивановичю Воротынскому.
В Шуе быти Передового полку воеводе князю Петру Ивановичю Шуйскому.
В Муроме быти Передового же полку другому воеводе князю Василью Федоровичю Лопатину.
На Костроме быти Правой руке воеводам боярину князю Александру Борисовичю Горбатого да дворецкому углецкому князю Василью Семеновича Серебренаго.
В Ярославле быти воеводам Левые руки князю Михаилу Ивановичю Воротынскому да Борису Ивановичю Салтыкову.
