Мин да толлубаппын
Тымныы муус оҕуһуттан
Саха оҕото буолабын,
Чооруос чыычаах доҕордоохпун.
Бэҕэһээ дьоро күн
Аймах Далбар Хотуна
Алта уон бэһис хаарын
Охторбут күнэ!
Ыраас, сылаас дьиэ,
Мааны астаах сандалы,
Улахан убайдар, саҥастар,
Аҕам саастаах аймахтар.
Үөрүүлээх остуол
Соһуччу үөрүүтэ
Сиэн кыра кыргыттар
Салаат бастыҥын астаабыттар.
Аҕа баһылык Дьөгүөр
Аймах тутаах киһитэ,
Ыраахтан кэлбит Боккуойа,
Ыпсарбыттар тэрээһини.
Күө-дьаа, ирэ-хоро
Көрдөөх кэпсээн,
Көр-нар күөдьүйдэ,
Көҕүлүттэн тутулунна.
Арыылаах саламаат кэннэ
Амарах алгыс тыллар
Аймах билэ дьонтон
Ананнылар юбилярга.
Сааскы чуумпу сарсыарда
Күммүт таҕыста хайаттан,
Аммам барахсан нуурайан
Ыраас ньуура килбэйдэ.
Уу үрдүнэн хоптолор
Аргыый охсунан көтөллөр,
Кыралаан саҥаран, кэпсэтэн
Олохтон дуоһуйар курдуктар.
Өрүһүм сиэркилэ ньууругар
Балык сэмсээн оонньоото,
Биэрэккэ үүммүт талаҕым
Күлүгүн эбэҕэ көрүннэ.
Ыраах үөскэ куоҕастар
Умсаллар, усталлар, оонньууллар,
Эбэм тымныы уутугар
Таптал уотугар сылдьаллар.
Үрдүк кытылга олорон
Ахтыбыт Аммабын көрөбүн,
Мүөттээх сөрүүн салгынын
Дуоһуйа толору тыынабын.
Ыттан ыһык ирдээбэттэр,
Ытанньахтан көмө көрдөөбөттөр,
Ытыһы тоһуйар умнаһыттар
Ынах ыан абыраабаттар.
Көрдөс көмөнү үлэһиттэн,
Сүбэлэт олоххор сүгэһэрдээхтэн,
Ыйдар суолгун кырдьаҕастан,
Айаҥҥа аргыстас доҕоргунаан.
Бэйэҥ көмөлөс мөлтөөбүккэ,
Сүбэлээ эрэнэн көрдөспүккэ,
Өйөө үтүө ыралааҕы,
Көмүскээ кырдьыгын күөмчүлэппити.
Олох сокуона чопчу
Оҥоһуллубута ыраатта,
Ол да буоллар билигин
Ону тутуспат дэлэччи.
Уһуктаат ойон турума,
Ороҥҥо сытан санаа
Ааспыт күнүҥ туһунан.
Бүгүҥҥү күнү ыралаа,
Ааспыт күҥҥэ тэҥнээн.
Бүгүҥҥүнэн олор дииллэр,
Олох сыыһа суолу
Соруйан ыйан этэллэр.
Кэлэр кэми – кэскили
Ыйдаҥарда санаабат
Ычата кыра дэнэрэ
Ыччакка дьэҥкэ буолуохтаах.
Олоруохха, ааспыты ахтан,
Олоруохха, бүгүҥҥүнү ыпсаран,
Олоруохха, инникини ыралаан,
Барытын сааһылаан, тэҥилээн.
Ахтылҕан, ахтыы
Аһара дьикти түгэн.
Ахтылҕан арыт аалар,
Курас тыал курдук
Куурдар, хатарар дууһаҕын.
Ахтылҕан арыт ыҥырар
Кэрэҕэ, сырдыкка, ыраахха.
Күүскэр күүс эбэр,
Ыраах сиэтэн барар.
Ахтыы курас тыала
Эрийбэтин эйиигин.
Үтүө өрүттээх ахтылҕан
Сылаас тыала сипсийдин,
Дууһаҥ уотун күөдьүттүн.
Бүгүн сааскы күн,
Бүгүн иэйии күнэ,
Бүгүн иэйэхсит күнэ,
Бүгүн Дьахтар күнэ.
Эбээ сылаас таптала,
Ийэ бүппэт таптала,
Ойох минньигэс таптала
Олох хорук тымыра.
Кинилэр баар буоланнар
Күннэтэ олох салҕанар,
Кэрэҕэ тардыһыы
Кэхтибэккэ сайдар.
Киһи-аймах аҥарын
Кэрэ дьикти дьоммутун
Кэлбит мааны күнүнэн
Күҥҥэ тэҥнээх эҕэрдэ!
Кэрэ мааны дьоммут,
Кэхтибэтин үүннэрбиккит,
Көҕүрээбэтин бүөбэйдээбиккит,
Сайыннын саҕалаабыккыт!
Кырыалаах кыһын уораана
Сааскы сылаас салгынныын
Уһун удьуордаах мөккүөргэ
Хатыстылар дьиҥнээхтик.
Күлүк-хорҕо сиргэ
Күн сылаас утаҕа
Кырыа көмүс кыырпаҕын
Көрдөрбүтүнэн көтүттэ.
Аһаҕас чэгиэн сиргэ
Тымныы салгын сүүрээнэ
Кыраһа хаары көтүттэ,
Дьыбарынан супту үрдэ.
Дьыл дуолан киирсиитэ
Дьикти кэрэ көстүү,
Дьиҥэр онтон салгыбыт
Дьиҥ олоххо суоҕа чахчы.
Сааскы кыраһа хаар
Саталы оргууй сапта,
Салгыны сытыытык быһаннар,
Суугунуу көттүлэр туллуктар.
Саас кэлтин биллэрэн
Сыа хаарга сырсаннар,
Сурук бөҕөтүн хаалларан,
Салгыы хоту көттүлэр.
Суруллубут суол суругу
Саҥа көрбүт оҕолуу
Сонурҕаан өр көрдүм,
