Святые священномученик Киприан и мученица Иустина. Житие, служба, акафист - страница 5

Киприан же книгы своя волшебныя, задев[51] отроком, и прииде с ними в церковь Божию и припаде к ногам блаженнаго Анфима епископа, глаголя: «Рабе блаженнаго Христа, хощу воин быти Христов, вчестися в стадо Его». Блаженный Анфим мнев, яко прельстити его хощет и верныя, рече к нему: «Киприане, не мози иску сити Церкви Божиа, непобедима бо есть сила Его». Киприан рече: «Аз верую Ему, яко непобедима есть: в сию бо нощь послах демоны на святую деву Иустину, хотя прельстити ю, и увидех, яко молитвами своими победи я знамением Христовым, отгиа я. Тем же приими книгы моя и сожзи огнем, а мя помилуй». Святый же Анфим, веру им, книгы его сожже, а самого, благословив, отпусти, рекый: «Подщися в церковь Божию». Киприан же шед в дом свой, сокруши же идолы; всю же нощь рыдаше и плакашеся, глаголя: «Увы мне, како могу явитись пред судищем Христовым, толико зол сотворь? Како благословлю усты моими, имиже кляхся, призывая нечистыя демоны?». Посыпавше главу свою пепелом, лежаше молча, милости Божиа прося. Утру же бывшю, в день суботный великыя Пасхы иде в церковь Божию. Грядый же по пути, нача глаголати: «Господи! аще есмь достоин раб Твой совершен нарещися, даждь да внидущю ми в церковь Твою, да услышю словеса святых книг подобна моему спасению. И влазящю ми в церковь, Давид глаголаше: "Видел еси не премолчи, Господи, не отступи от мене" [ср.: Пс. 82, 2]. Исайя же паки: "Се разумеется отрок Мой''[ср.: Ис.42, ^.Давид же паки: "Вариста очи мои ко утру, поучити ми ся словесем Твоим" [ср.: Пс. 118, 148]. И паки Исаиа: "Не бойся, отроча Мой Иакове и возлюбленный Иизраилю, иже Аз избрах" [ср.: Ис. 44, 2]. Такоже и Павел апостол: "Христос ны искупи от клятвы законныя" [ср.: Гал. 3,13]. Давид же паки: "Кто возглаголет силы Господня и слышаны сотворит вся хвалы Его?" [ср.: Пс. 105, 2]».

Потом просвещение евангельское; потом учение от епископа, паки слово катихуменьское, и диакон глаголя: «Катихумени внидете». Киприан же седяше, и рече ему диакон Астерий: «Иди вон». И рече Киприан: «Раб сотворен есмь Распятому, да изгониши мя вон?». Диакон рече: «Не уже совершен еси». Киприан рече: «Жив ми есть Христос, посрамлей демоны и святую деву спас и мя помилуй, не изиду сице, аще не буду совершен». Диакон же Астерий возвести епископу. Призвав же и епископ, истяза и по закону, и молитву сотвори над ним, яко всем плакатися; и тако крести и. В осмый же день подобник[52] бысть Тайнам Христовам. В 20-й же день иподиакон же и дверник Святым Тайнам святаго двора, в 50-й же день диакон Христов бысть. Благодать же дана ему бысть на бесы и всяк недуг исцеляше, многы же от елиньскыа веры учаше быти христианы. Скончавшю же лету, соседник[53] бысть епископу; пожит же в чину прозвитерьства 16 лет. Блаженый же Анфим, созвав епископы от окрестных град, поведа им о церковном устроении еще жив сы, и вдасть стол епископства Киприану, не по мнозих днех почи о Христе с миром: Мног же устрой сотвори Киприан в церкви, святую же деву диаконису сотвори и нарече ей имя Иустина, и сотвори ю матерь монастырем. И многы ж просвети словесем Киприан и отторгая от ереси прилагаше к стаду Христову, Емуже слава в векы веком. Аминь.

Пророческым словесем сбывающимся и словесем Господа нашего Иисуса Христа осеянней пшеници, плевелом же множащимся, толику же стаду отпадшю от веры и людем расточеном бывшем, святый Киприан книгами своими вся исправль во всех градех, многы же отторже ото льсти диаволя. Старый враг змий с своими слугами наустив толми князя с людми области восточными, глаголя, яко Киприян учитель христианеск разаряет славу бог[ов], волхвует же с етерою девою Иустиною и развращает всю восточную и всю вселенную книгами своими. Князь же разгневався зело, повеле связавше святаго Киприана и святую Иустину вести сохранно в Дамаск. Приведенома же има бывшема, вопроси князь Киприана: «Ты ли еси учитель христианеск, уловлей иногда многыи в славу бог[ов], ныне же чарми Распятаго развращаеши слух человеком, лучша творя Распятаго живых бог[ов]?».