Радуйся, всем православным во бранех скорый помощниче,
радуйся, страны Российской славный Заступниче,
Радуйся, щите несокрушимый всем за правду воителям,
Радуйся, всемощный их покровителю,
Радуйся, нравов благих насадителю
Радуйся, нечестия обличителю и искоренителю.
Радуйся, святый праведный Феодоре, архистратиже Державы Российския!
Пение у раки мощей Твоих, праведный воине Феодоре, никогда же оскудевает: все бо страждущие и алчущие правды, о Державе Российской болезнующие и блага ея взыскующие, вседушно к ней притекают. Тем же никто же от Тебя тощ и неутешен отыде, но всем в сладость быти славное заступление Твое. Сего ради вопием о Тебе Богу:
Аллилуйя!
Икос 11
Яко на стену тверду и несокрушиму надеемся на ходатайство Твое пред Христом Богом нашим, святый праведный Феодоре. Темже, упование наше на предстательство Твое возложив, вопием тебе сице:
Радуйся, верно служащим Державе Российския покрове и помоще!
Радуйся, пред Богом о них пресильный ходатаю!
Радуйся, заступниче земли Российския Богом данный! Радуйся, всякого нечестия в ней истребителю! Радуйся, всех в России благих устроителю!
Радуйся, до Страшного Суда Христова о ней пред Богом Ходатаю!
Радуйся, святый праведный Феодоре, архистратиже Державы Российския!
Благодать, данную Ти от Бога, помогать всем пекущимся о благе Державы Российския, ведают вси православнии, святый воине Феодоре. Темже, на милостивое твое защищение упование возложив, вопием Богу:
Аллилуйя!
Икос 12
Поющее Твое славное заступление, святый праведный воине Феодоре, вседушно Тя восхваляем. Всяк бо положивый на сердце верно служити Державе Российской и Святой Православной Церкви верное защищение в тебе обретает. Сего ради мы, младшие братия Твои, верно вопием Ти:
Радуйся, щите армии Российския несокрушимый! Радуйся, меч в бранях воинам ея непобедимый!
Радуйся, страны Российския надеждо и ограждение! Радуйся, Православия всехвальное в ней утверждение!
Радуйся, всех православных упование непоколебимое!
Радуйся, ходатай мощи Державы Российския непобедимый!
Радуйся, святый праведный Феодоре, архистратиже Державы Российския!
Кондак 13
О, святый всехвальный воине Феодоре, похвало и утверждение Державы Российския, всем приходящим и обращающимся к тебе скорый помощниче! Помози нам в многоскорбном сем житии и како во дни земного поприща Твоего всем страждущим, помощи Твоея просящим и верно служащим России помощник явился еси, так и ныне не остави нас, уповающих на Тя, помози бурные волны моря жития сего без порока прейти и достигнути селений райских, поя с Тобою и со всеми Святыми Подателю всех благ:
Аллилуйя!
Сей кондак глаголи трижды, затем икос 1 и кондак 1.
Молитва святому праведному воину Феодору Ушакову
О, святый праведный воине Феодоре, Державы Российския Архистратиже и славный защитниче! Ты во дни земного жития твоего добре за землю Русскую подвизался еси, от врагов ее защищая и флот ея, как непоколебимое основание мощи ея, в ней утверждая! К тому же и пастырь добрый людям своим явился еси, будучи воинам дружины своея воистину отец чадолюбивый, не токмо властем земным, но паче самому Богу за вверенную тебе паству ответ дая. Сего ради прослави тя Бог яко дивного угодника Своего, яко честное служение Отечеству своему, кое преддверие Отечества Небесного – служение Самому Богу есть – тем знаменуя.
Сего ради молим тя: буди стране нашей по прежнему славный защитниче, властем ея – добрый советниче и помощниче, всем за славу Родины своея и Церкви Православныя воюющим добрый споспешниче и во всяком деле блазе молитвенный пред Богом предстателю!
