Біблейскія гісторыі Новага Запавету, ілюстраваныя паштовымі маркамі. Развагі над зьместам Бібліі - страница 23

Марку з рэпрадукцыяй карціны Эль Грэка «Сьвятое сямейства» выпусьціла пошта Экватэрыяльнай Гвінэі ў 1972 г.

Найбольш выбітныя мастакі ахвотна і многа малявалі Марыю з Немаўлём і Сьвятым Язэпам, часта дадаючы хлапечую постаць Сьвятога Яна Хрысьціцеля. Гэтая сцэна цалкам адпавядала попыту на прыватныя рэлігійныя карціны, якія асьвячалі хатні ачаг, ідэю шлюбу і бацькоўства. Дазваляла паказаць цяпло ўзаемных адносін, важнасьць сям’і ў фарміраваньні дзіцяці і ўкараняла ўвасобленага Бога ў звычайным чалавечым Сьвеце.

Блёк Парагваю (1982 г.) «Сьвятое сямейства Францыска І» (Люўр, Парыж). Дзева Марыя з Немаўлём Хрыстом, Сьвяты Язэп, Сьвятая Елісавета з сынам Янам Хрысьціцелем. Ззаду фігуры двух анёлаў

«Мадонна з ружай» (Музэй Прада, Мадрыд, Гішпанія). Сьвяты Язэп, Сьвятая Марыя, немаўлята Ісус і Ян Хрысьціцель, у якога ў руцэ палоска паперы з надпісам «Ecce Agnus Dei» (Вось Ягня Божае). Блёк пошты Парагваю (1983 г.)

«Мадонна з Дзіцём і Сьвятой Ганнай» – адна з самых прыгожых карцін Караваджа (1605—1606) Багародзіцы для свайго часу. Маці Божая маладая і прыгожая вучыць свайго сына, якога яна трымае, зьнішчыць зьмяю, сымбаль зла або першароднага граху. Сьвятая Ганна, у гонар якой прызначалася карціна, маршчыністая старая бабуля, сьведка падзеі.

Выяву карціны адлюстравала на блёку ў 2004 г. пошта краіны Сэнт-Вінсэнт і Грэнадыны

Ісус, азораны залатым Сьвятлом, якое сыходзіць з неба, параніў сябе, робячы цярновы вянок. Маці з сумам назірае за сынам, ведаючы, якія пакуты Яго чакаюць. Сцэна поўная сымбаляў. Фіялетавая туніка – вопратка, якую насілі Сьвятары падчас Адвэнту, шыцьцё і кнігі спасылаюць на каханьне да працы, садавіна на стале намякае на выкуп, галубы – на ахвяру…

«Дом у Назарэце» (Марыя, якая разважае пра будучыню Хрыста) так называецца карціна Франсіска Сурбарана, выява якой адлюстравана на блёку пошты Эмірату Рас-эль-Хайма (1970 г.).

Марыя ведае, што яна ў бліжэйшы час будзе сузіраць, як Ён, яе Сын, мучыцца на крыжы. Яго цела паламаюць, пакрыюць ранамі.

«Мая каханая Маці», кажа Ісус ёй: «Ты павінна прыгатаваць сябе. Такая воля Айца Майго. І адкупленьне чалавецтва можа быць дасягнута толькі за кошт кожнай кроплі Крыві Сына Твайго.»

На марцы пошты Лаосу (1984 г.) выява карціны Антоніа да Карэджа. Самы ласкавы з сыноў чалавечых, разьвітваецца з каханай маці

Гэту галерэю прыкладаў выяваў карцін Сьвятога сямейства, надрукаваных на паштовых марках, можна было б доўжыць і доўжыць. Але гэта можа зрабіць кожны ахвочы сам для сябе, падбіраючы, перш за ўсё тое, што хоць кропельку наблізіць да большага разуменьня Бібліі.

Сусветная іканаграфія ведае 700 назваў ікон Багародзіцы. Марыялогія вылучае наступныя тыпы: Адзігітрыя («Шляхаводніца»), Аранта («Знаменьне»), Еляуса («Замілаваньне»), і Акафістная.

Вылучаецца асобна тып Агіёсарытыса («Нявеста Ненявестная») – Багародзіца без Дзіцяці Хрыста.

Пошты краін сьвету не ў стане адлюстроўваць усё мноства ікон і кожная краіна выбірае найбольш шануемыя і блізкія для яе народу. Так і я ў сваім артыкуле вырашыў расказаць аб найбольш шануемых абразах Маці Божай на Беларускай зямлі і аб іконах, якія адлюстравала на сваіх марках Беларуская пошта.

Спрадвеку на нашай зямлі і сярод праваслаўных, і сярод каталікоў культ Багародзіцы быў асаблівы. Маці Божая – Заступніца, Апякунка, Збавіцельніца, Міласэрная… Беларускі народ шмат прыдумаў Ёй імёнаў, у якіх – непазбыўная надзея і самая шчырая вера. Можа, таму на Беларусі столькі прыгожых і вельмі жыцьцёвых легенд аб Яе дзівосным зьяўленьні, столькі камянёў-сьледавікоў – на іх відаць адбітак зграбнай ступні, і лічыцца, што такія сьляды пакінула Багародзіца, ходзячы па нашай зямлі, столькі цудатворных ушаноўваемых ікон…