Вы же, как то и время являет, что моих слов и много поученья не слушаете, но исполнивайте волю телесную и дела темные, а слова моего не слушаите. Не ведаете ли, что все русское земли владыки под моею властью суть и в моеи воли? И яз их ставляю от благодати Пресвятого Духа. Такоже и подана власть владыце вашему: вы пак как его слов не приимаете, но странных пастухов приимаете, и как то видится, несте от паствы истинного пастуха Христа, но противного духа: ибо овца словесныя Христовы гласа Христова слушают и последуют слова нашего. Мы бо Христовы есмы и Хростове слова глаголем, кий же есть Христов, слушает нас и сотворяет, елико пишу; кий же не слушает нас, не есть Божий, ибо истинный хрестьянин и верный от дел своих является, якоже и Апостол глаголет: «вера без дел мертва есть, тако же и дела без веры». Того ради, дети, створяйте дела светла; всяка бо злоба и горесть и ярость и гнев блуд и прелюбодейство, обида и зависть, убийство и пьянство да отъимется от вас, зане Апостол глаголет: «братья, не прельщайтеся: ни блудници, ни прелюбодейцы, ни идолослужители, ни творяще блуд рукою, ни мужеложници, ни лихоимци, ни татеве, ни грабители царства Божьего не наследят». Си слышате, возлюблении, от святых, всегда покайтеся и обратитеся к Богу, поучитеся благая сотворити и стерезите себе. Поминайте всегда смерть и воскресенье и суда оного страшного и судью оного великого и страшного, сведый сердца человеческая и помышленья и деянья, а праведным вечный покой, а грешным вечную муку. Вся та аще имете поминати, николи не согрешите, не ослушиваите имете нас, иже постави Дух святый пастухов и учителев ко всем христьанам. К церквам всегда прибегайте, с женами и с детми, и что имеете в руках, приносите к церквам и к святым. А священников и мнихов любите и просите молитвы их; вдовиц и сирот, и полонянников, и странных милуйте и призирайте, иже в темницах, посетите да сподобитеся блаженного оного святого гласа истинного Христа, глаголюща: «приидете благословении Отца моего, и наследуйте уготованное вам царство от сложенья мира: алчен бех, накормисте мя, и жаден, напоисте мя, странен бех, и введосте мя, болен и в тесмнице, посетисте мя, а злая створяше и беззаконная и немилостивии, не жалостивии, поити им в тьму кромешнюю. Иже имете исполнивати се, спасени будете, и не тяжко есть се.
О том же переделе, по Великую Ворону, возле Хопор, до Дону, по караулом, церкви, что тот передел, как то пишут грамоты брата моего Максима митрополита, и Петра, и Феогноста, что собором створили на Костроме, и владыка Сафоний дал грамоты из уст своих, что ему от тех мест, по тем грамотам, не лзе вступатися в тот передел чюжий, и явно есть и вси ведают, что тот передел не сарайский. Ныне же пак владыка Афанасий сарайский уведав то, видов грамот тех, и за вину его покажнен от митрополита, писаньем отступился того передела; и от сих мест владыце Афанасию сарайскому несть власти в том переделе, но власть рязанская, попы и дьяконы поставляющего владыки и власть дающаго. И ныне послал есмь к вам владыку рязанского Василья с грамотою своею: и вы поминайте его, а пошлину церковную дайте ему по обычаю. Аже исполните, как то пишу к вам, душеполезная и спасеная, а грамоты послушаите, да и пошлину церковную даите, милость Божия и святой Богородицы и мое благословение да будет с вами и с женами вашими и с детми, и со всеми хрестьяны.
